საქართველო არის საყრდენი ქვეყანა რეგიონულ დაკავშირებადობასა და საზღვართშორის სატრანსპორტო დერეფნებში, განსაკუთრებით კარეკის მეორე დერეფნისა და შუა დერეფნის ფარგლებში, რომელიც ცენტრალურ აზიას, სამხრეთ კავკასიასა და ევროპას აკავშირებს, – განაცხადა აზიის განვითარების ბანკის წარმომადგენლობის დირექტორმა საქართველოში ლესლი ბეარმან ლამიმ Business Insider Georgia-სთან ინტერვიუში.
მისივე თქმით, საქართველო უზრუნველყოფს ტვირთბრუნვას შავი და კასპიის ზღვების რეგიონებს შორის და მათ ფარგლებს მიღმაც, ხოლო ამავე დროს წარმოადგენს მნიშვნელოვან ლოჯისტიკურ კვანძს, სადაც გაუმჯობესებული გზები, პორტები, რკინიგზა და სასაზღვრო ინფრასტრუქტურა ქმნის ადგილობრივ დამატებულ ღირებულებას სატრანსპორტო მომსახურების, ვაჭრობის, ტურიზმისა და დასაქმების გზით.
„ADB-ის ინვესტიციები აღმოსავლეთ-დასავლეთის მაგისტრალურ გზის დერეფნებში, მათ შორის საერთაშორისო სავაჭრო მარშრუტებთან დაკავშირებულ მონაკვეთებში, პირდაპირ უჭერს მხარს ამ როლს. პროექტები, როგორიცაა ბათუმის შემოვლითი გზა და სხვა სტრატეგიული საავტომობილო მონაკვეთები, ამცირებს სატრანსპორტო გადატვირთვას, ზრდის უსაფრთხოებას და ამოკლებს ტვირთების გადაადგილების დროს.
პოლიტიკის დონეზე ADB ასევე უჭერს მხარს რეფორმებს, რომლებიც მიმართულია ტრანსპორტის ეფექტიანობის გაუმჯობესებისკენ, საბაჟო კოორდინაციისა და საზღვართშორისი ლოგისტიკის გაძლიერებისკენ – რაც კრიტიკულად მნიშვნელოვანია ხელშესახები ინფრასტრუქტურული კავშირების შესაქმნელად.
საქართველოს შეუძლია მიიღოს სარგებელი დივერსიფიცირებული სავაჭრო მარშრუტებიდან, განსაკუთრებით იმ პირობებში, როდესაც გლობალური მიწოდების ჯაჭვები მდგრადობისკენ ისწრაფვის. მრავალმოდალური ტრანსპორტის უწყვეტი განვითარება – გზების ეფექტიანი ინტეგრაცია პორტებსა და რკინიგზასთან – აუცილებელი იქნება, რათა საქართველომ სრულად გამოიყენოს ეს შესაძლებლობა“, – აღნიშნა ბეარმან ლამიმ.
