რა თქმა უნდა, მინელდა და ეს არის ყველაზე მნიშვნელოვან ფაქტორზე დამოკიდებული: ყველას კარგად გვახსოვს ის ცრუ აღქმებით ინსპირირებული აქციები, ძალიან დიდი თანხებით დაფინანსებული აქციები. არაერთი გამოძიება, არაერთი დამდგარი განაჩენი ვნახეთ. არაერთი, სხვათა შორის, ჟურნალისტური გამოძიებაც ვნახეთ იმ საქმეებთან ერთად, თუ რეალურად რას ამზადებდნენ, როგორ ემზადებოდნენ, საიდან რა დაფინანსება მოსდიოდათ, – ამის შესახებ საპარლამენტო უმრავლესობის ლიდერმა ირაკლი კირცხალიამ საპროტესტო აქციების შესახებ დასმული კითხვის საპასუხოდ განაცხადა.
მისივე თქმით, საკანონმდებლო ცვლილებების ამოქმედებისა და დაფინანსების შემცირების შემდეგ პროტესტი განულდა.
“ჩვენ მივიღეთ ჩვენს საკანონმდებლო სივრცეში [კანონები], რასაც ასევე ამ აღქმების თეორიით მოჰყვა მრავალი ე.წ. პროტესტი, პროტესტი, რომელიც ამბობდა, რომ თურმე აქ ქვეყნისთვის იბრძვიან და თურმე ქვეყნის დემოკრატიას არჩენენ. ჩვენი პასუხი რა იყო? იყო ერთი: არ არსებობს პროტესტი, რომელსაც არ აქვს საფუძველი. ამ პროტესტს, რა თქმა უნდა, არ ჰქონდა საფუძველი, იმიტომ, რომ იყო მხოლოდ და მხოლოდ სიცრუეზე და ცრუ აღქმებზე, აგენტურის დაგეგმილი, გარედან დახმარებული ე.წ. აქციები. როგორც კი ამოქმედდა საკანონმდებლო სივრცეში ის უმნიშვნელოვანესი კანონები ჩვენი ქვეყნისთვის და არა მხოლოდ ჩვენი ქვეყნისთვის – ნებისმიერი დამოუკიდებელი, თავმოყვარე ქვეყნისთვის, რაც აქვთ და მოქმედებს სხვადასხვა საკანონმდებლო სივრცეში, დაფინანსებები შეუმცირდათ. პროპორციულად, როგორც კი მათ თვიდან თვემდე, წლიდან წლამდე უმცირდებოდათ დაფინანსებები, ვხედავდით ის ე.წ. ეროვნულ ფასეულობებზე დაყრდნობილი პროტესტი როგორ ჩაიფუშა და განულდა.
დარჩა გათითოკაცებული, ალბათ დახელფასებული, შემჭიდროებული ბიუჯეტით ე.წ. პარტაქტივი, რომლებიც ყოველ შაბათს ან ყოველ ხუთშაბათ დღეს სადღაც დადიან. სწორად ეკუთვნით მათ [სიტყვა] სექტა, იმიტომ, რომ სექტანტები და სექტა იქცევა ასე, რომ რაღაც დღეს დაგეგმავენ – აი, ახლა უნდა ჩავიცვათ ეს ფორმა, გავიაროთ აქ და შემდეგ ალბათ, ყავას სვამენ, ან სადმე იკრიბებიან“, – განაცხადა ირაკლი კირცხალიამ.
