გერმანელმა სამართალდამცველებმა საქსონიის მიწის პარლამენტის წევრი პარტია „ალტერნატივა გერმანიისთვის“, იორგ დორნაუ ბელარუსის წინააღმდეგ დაწესებული სანქციების გვერდის ავლის ბრალდებით დააკავეს. ინფორმაციას Bild-ი ავრცელებს.
56 წლის პოლიტიკოსი ადგილობრივი პარლამენტის სესიის მსვლელობისას დააკავეს. ის ჯერ დაკითხეს, ხოლო შემდეგ პოლიციის განყოფილებაში გადაიყვანეს. პარალელურად პოლიციამ მის სახლსა და ბიზნეს-ობიექტებში ჩხრეკა ჩაატარა.
მანამდე ადგილობრივმა პარლამენტმა დორნაუს იმუნიტეტი მოუხსნა. დეპუტატის დაკავებას სესიის დროს და მის დაკითხვას უპრეცედენტო მოვლენად აფასებენ.
ქალაქ ლაიფციგის პროკურატურის მიერ გავრცელებული განცხადების თანახმად, დორნაუს ბრალად საგარეო ვაჭრობისა და გადასახადების შესახებ კანონმდებლობის დარღვევა ედება. კერძოდ, 2022 წელს მან ამწე მანიპულატორი ბელარუსში გააგზავნა მაშინ, როცა დანიშნულების საბოლოო ადგილად ყაზახეთი იყო მითითებული. გარდა ამისა, საბრალდებო დასკვნაში წერია, რომ დეპუტატს ბელარუსში ბიზნესი ჰქონდა გახსნილი.
