აშშ-ის მიერ ბლოკადის გამოცხადების მიუხედავად, ჰორმუზის სრუტე ირანთან დაკავშირებულმა უკვე მესამე ტანკერმა გაიარა. ინფორმაციას Reuters-ი ავრცელებს.
აშშ-ის პრეზიდენტმა, დონალდ ტრამპმა ჰორმუზის სრუტის ბლოკადის შესახებ ჯერ კიდევ შაბათს განაცხადა, მას შემდეგ, რაც ისლამაბადში აშშ-ირანის მოლაპარაკებები წარმატების გარეშე დასრულდა, წერს სააგენტო.
როგორც Reuters-ი აღნიშნავს, იმის გამო, რომ აღნიშნული სამი გემი ირანულ პორტებში არ შედიოდა, მათ სრუტის გავლის უფლება მიეცათ.
ასე, მაგალითად, პანამის დროშის ქვეშ მცურავი საშუალო ზომის ტანკერი Peace Gulf არაბთა გაერთიანებული საამიროების ჰამრიას პორტში უნდა შევიდეს. Reuters-ის ცნობით, აღნიშნული გემი, როგორც წესი, ირანული ნავთობისა და ნავთობქიმიური ნედლეულის გადაზიდვით არის დაკავებული.
მანამდე სრუტე კიდევ ორმა ტანკერმა გადაკვეთა, რომლებიც აშშ-ის სანქციების ქვეშ იმყოფებიან. ერთ-ერთი ტანკერი ერაყში მიდის, რათა 16 აპრილს მაზუთით დაიტვირთოს.
სააგენტოს ცნობით, ჰორმუზის სრუტეში კიდევ ერთი ტანკერი სახელწოდებით Rich Starry შევიდა, რომელიც მას მალე დატოვებს. აღნიშნული გემიც ამერიკული სანქციების ქვეშ იმყოფება.
