საპარლამენტო უმრავლესობის წევრი, თენგიზ შარმანაშვილი, დიდი ოდენობით თანხის მართლსაწინააღმდეგო მითვისების ფაქტზე დაკავებული გიორგი ჩიკვაიძის მიერ ციხიდან გავრცელებულ წერილს ეხმიანება, რომელშიც ჩიკვაიძე წერს, რომ მისგან და მისი ბიზნესპარტნიორისგან, პრეზიდენტი მიხეილ ყაველაშვილი შეწყალების თხოვნას “ვერ ეღირსება”.
შარმანაშვილის განცხადებით, ჩიკვაიძეს შეუძლია ისე მოიქცეს, როგორც სურს, თუმცა, სიტუაციას ისე ხატავს, თითქოს, თუ შეწყალების თხოვნას არ დაწერს, ხელისუფლება ჩამოიშლება.
“ვერ ეღირსებით, რას ნიშნავს? რაც არ გინდათ, არავინ დაგაძალებთ. ისე ნუ დახატავთ სიტუაციას, რომ თუ თქვენ არ დაწერთ შესაბამის თხოვნას, ეს ხელისუფლება ჩამოშლის პირას მივა. არ მივა. დანარჩენი, როგორც გენებოთ.” – წერს შარმანაშვილი სოციალურ ქსელში.
ჩიკვაიძე და პაპიაშვილი სასჯელს იხდიან წინასწარი შეთანხმებით, ჯგუფის მიერ, სამსახურებრივი მდგომარეობის გამოყენებით დიდი ოდენობით თანხის მართლსაწინააღმდეგო მითვისების ფაქტზე, რამაც 1 155 019 ლარის ზიანი გამოიწვია.
