საქართველო არის ქვეყანა, რომელიც იზიარებს ევროპულ ღირებულებებს – ღირებულებებს, რომლებიც ორგანულია ჩვენი საზოგადოებისთვის. თუმცა, 2022 წელს ევროკავშირში გაწევრიანების განაცხადის შეტანის შემდეგ, ჩვენ აღმოვჩნდით ისეთ მდგომარეობაში, როდესაც აუცილებელი გახდა ჩვენი სუვერენიტეტისთვის აქტიური ბრძოლა, რადგან ამ საკითხმა ეგზისტენციალური მნიშვნელობა შეიძინა, – განაცხადა საქართველოს საგარეო საქმეთა მინისტრმა, მაკა ბოჭორიშვილმა უნგრეთის პარლამენტში სუვერენიტეტისა და მიგრაციის შესახებ პანელურ დისკუსიაზე სიტყვით გამოსვლისას.
მისი თქმით, სამწუხაროდ, ევროკავშირში გაწევრიანების განაცხადის შეტანის შემდეგ, ეს მნიშვნელოვანი საკითხი იქცა პოლიტიკური ზეწოლის, შიდა საქმეებში ჩარევის ინსტრუმენტად, რაც მიუღებელია.
მინისტრის თქმით, ევროპას მომავალი არ ექნება, თუ ყველა ქვეყანა არ გაერთიანდება იმ საერთო პრინციპების გარშემო, რომლებიც საუკუნეების წინ ჩამოყალიბდა.
„უპირველეს ყოვლისა, მოხარული ვარ, რომ ვიმყოფები ამ შენობაში, პარლამენტის წევრებთან ერთად. როგორც პარლამენტის ყოფილი წევრი, პატივად მივიჩნევ აქ ყოფნასა და ჩემს ქვეყანასთან უშუალოდ დაკავშირებული მნიშვნელოვანი თემის განხილვას. მე წარმოვადგენ ქვეყანას, რომელიც, როგორც თქვენ აღნიშნეთ, ჯერ კიდევ არ არის ევროკავშირის წევრი, მაგრამ ესწრაფვის ევროკავშირში გაწევრიანებას. ჩემი ქვეყანა საუკუნეების განმავლობაში ცდილობდა ევროპულ ოჯახში ინტეგრაციას, ხოლო ბოლო ათწლეულებში – ევროკავშირში გაწევრიანებას. საბჭოთა კავშირის დაშლის შემდეგ, ჩვენ ევროპულ სტრუქტურებს, განსაკუთრებით კი ევროკავშირს, ჩვენი სუვერენიტეტის დაცვის საუკეთესო გარანტად მივიჩნევთ. სწორედ ასე ვხედავთ და ასე გვინდა დავინახოთ ევროკავშირი. სწორედ ამიტომ შევიტანეთ განაცხადი ევროკავშირში გაწევრიანებაზე და სწორედ ამიტომ გავაფორმეთ ასოცირების შესახებ შეთანხმება ევროკავშირთან 2014 წელს. საქართველო არის ქვეყანა, რომელიც იზიარებს ევროპულ ღირებულებებს – ღირებულებებს, რომლებიც ორგანულია ჩვენი საზოგადოებისთვის. თუმცა, 2022 წელს ევროკავშირში გაწევრიანების განაცხადის შეტანის შემდეგ, ჩვენ აღმოვჩნდით ისეთ მდგომარეობაში, როდესაც აუცილებელი გახდა ჩვენი სუვერენიტეტისთვის აქტიური ბრძოლა, რადგან ამ საკითხმა ეგზისტენციალური მნიშვნელობა შეიძინა. როდესაც საქმე უსაფრთხოებას შეეხება, სუვერენული გადაწყვეტილებების მიღება სასიცოცხლოდ მნიშვნელოვანია ქვეყანაში მშვიდობის, სტაბილურობისა და ეკონომიკური ზრდის უზრუნველსაყოფად. საქართველოს ეკონომიკური ზრდა წლიურად 9.5%-ს შეადგენს, რაც ევროპაში შთამბეჭდავი მაჩვენებელია. ამ შედეგის მიღწევა ერთადერთ პრინციპს ეფუძნება – ჩვენ უნდა დავიცვათ ჩვენი ქვეყნის სუვერენიტეტი და საფრთხე არ უნდა შევუქმნათ მშვიდობას ამ რთულ გეოპოლიტიკურ გარემოში.
როგორც მოგეხსენებათ, საქართველოს ტერიტორიის 20% კვლავ რუსეთის მიერ არის ოკუპირებული, რაც ეგზისტენციალურ საფრთხეს უქმნის ჩვენს ქვეყანას. სწორედ ამიტომ, საქართველოსთვის განსაკუთრებით მნიშვნელოვანია მაქსიმალური ყურადღებისა და სიფრთხილის გამოჩენა ამა თუ იმ გადაწყვეტილების მიღებისას.
სამწუხაროდ, ევროკავშირში გაწევრიანების განაცხადის შეტანის შემდეგ, ჩვენ დავინახეთ, თუ როგორ იქცა ეს მნიშვნელოვანი საკითხი, რომელსაც მხარს უჭერს საქართველოს მოსახლეობის დაახლოებით 90%, პოლიტიკური ზეწოლის, შიდა პოლიტიკური თამაშების, გარე ზეწოლისა და შიდა საქმეებში ჩარევის ინსტრუმენტად, რაც მიუღებელი უნდა იყოს ნებისმიერი სახელმწიფოსთვის. ჩვენ სულ უფრო ხშირად ვხედავთ, რომ ეს პრობლემა არსებობს არა მხოლოდ ევროკავშირის გარეთ, არამედ ევროკავშირის შიგნით – მის წევრ სახელმწიფოებშიც. ეს ერთგვარად საერთო პრობლემად იქცა და ჩვენ უნდა დავფიქრდეთ, როგორ ევროპაში გვინდა ცხოვრება.
მე მჯერა, რომ ვეკუთვნი მსოფლიოს სწორედ ამ ნაწილს და ვიზიარებ ყველა თქვენგანის შეშფოთებას ევროკავშირის და ევროპის მომავალთან დაკავშირებით. რადგან დარწმუნებული ვარ – ევროპას მომავალი არ ექნება, თუ ყველა ქვეყანა არ გაერთიანდება იმ საერთო პრინციპების გარშემო, რომლებიც ათწლეულების, ან თუნდაც საუკუნეების წინ ჩამოყალიბდა.
სუვერენიტეტის საკითხს განსაკუთრებული სერიოზულობით უნდა მივუდგეთ, რადგან სწორედ ეს არის ის ერთადერთი მყარი საფუძველი, რომელსაც ევროპის მომავალი უნდა ეფუძნებოდეს: სახელმწიფოების მიერ სუვერენული გადაწყვეტილებების დაცვა და ქვეყნების სუვერენიტეტის უზრუნველყოფა.
მადლობას მოგახსენებთ“, – განაცხადა ბოჭორიშვილმა.
