„დახმარება და თანადგომა უმნიშვნელოვანესია, განსაკუთრებით მაშინ, როდესაც საქმე მძიმე გენეტიკურ დაავადებებს ეხება. დიუშენის კუნთოვანი დისტროფიით დაავადებული ბავშვებისა და მათი ოჯახების გვერდში დგომა თითოეული ადამიანის ბუნებრივი სურვილია. თუმცა, მნიშვნელოვანია ემოციების მიღმა რეალობის დანახვა. აუცილებელია დავინახოთ, რა დგას ამა თუ იმ კამპანიის მიღმა“- წერს ექსპერტი, დავით ჩიხელიძე სოციალურ ქსელში და ამბობს, რომ „საქართველოში ყველაფრის პოლიტიზების მავნე პრაქტიკა ჩამოყალიბდა.“
ჩიხელიძე აკრიტიკებს ოპოზიციას და ამტკიცებს, რომ ისინი დიუშენის კუნთოვანი დისტროფიის თემას პოლიტიკური მიზნებისთვის იყენებენ და ამით საზოგადოება შეცდომაში შეჰყავთ. მისი თქმით, მოთხოვნა „წამალი ბავშვებს“ არარეალისტური იყო, რადგან ამ ეტაპზე ამ დაავადების განკურნებადი წამალი არ არსებობს.
ექსპერტი ხაზს უსვამს, რომ მათ კამპანიის მიზანი მოგვიანებით შეცვალეს, კეთილშობილური იდეა მანიპულაციისთვის გამოიყენეს და კამპანიის მთავარ მიზნად არა წამლების შეძენა, არამედ დიუშენის კუნთოვანი დისტროფიით დაავადებულთა საჭიროებებისთვის აუცილებელი ინვენტარისა თუ პროცედურების შესყიდვა გამოაცხადეს, რასაც მისივე თქმით, სახელმწიფო უკვე წლებია, აღნიშნული დაავადების მქონე ადამიანებისთვის ყოველწლიურად გამოყოფს რამდენიმე მილიონ ლარს, რომელიც სრულად ხმარდება მათ ყოველდღიურ საჭიროებებს.
„სამწუხაროდ, გვყავს ოპოზიცია, რომელიც მუდმივად ცდილობს ნებისმიერი სენსიტიური თემიდან პოლიტიკური ქულების დაწერას, თუნდაც ეს ბავშვების ჯანმრთელობის საკითხს ეხებოდეს. დიუშენის კუნთოვანი დისტროფიით დაავადებული ადამიანების დახმარება ყველას საერთო სურვილია, მაგრამ ერთია სურვილი და მეორე ის მწარე რეალობა, რომლის წინაშეც არა მხოლოდ საქართველო, არამედ მსოფლიო დგას, ამ ეტაპზე აღნიშნული დაავადების განკურნებადი წამალი ბუნებაში უბრალოდ არ არსებობს. რა თქმა უნდა, მეცნიერები წლებია მუშაობენ მედიკამენტის შექმნაზე, თუმცა ამ ეტაპზე ეს პროცესი ხელშესახები შედეგის გარეშე მიმდინარეობს. ამ მოცემულობის ფონზე, საქართველოში ჯერ პოლიტიკოსებმა დაიწყეს კამპანია ლოზუნგით „წამალი ბავშვებს“, რაც თავიდანვე აბსურდული იყო, როგორ შეიძლება ითხოვდე იმ წამლის შეძენას, რომელიც არ არსებობს? ახლა კი დაიწყო ახალი კამპანია, რომლის თავდაპირველი მიზანი და მოთხოვნა კვლავ არარსებული წამალი იყო, თუმცა შემდგომში მისმა ავტორებმა მანიპულაციურ ხრიკს მიმართეს.
მათ კეთილშობილური იდეა მანიპულაციისთვის გამოიყენეს და კამპანიის მთავარ მიზნად არა წამლების შეძენა, არამედ დიუშენის კუნთოვანი დისტროფიით დაავადებულთა საჭიროებებისთვის აუცილებელი ინვენტარისა თუ პროცედურების შესყიდვა გამოაცხადეს. ამ ნაბიჯით ისინი პირდაპირ ახდენენ სახელმწიფოს დისკრედიტაციას და ცდილობენ საზოგადოებას შეუქმნან შთაბეჭდილება, თითქოს ხელისუფლება ამ ადამიანებს ყურადღებას არ აქცევს, რითაც ოპოზიციისთვის ქულების დაწერას ცდილობენ.
რეალობა სრულიად სხვაგვარია: საბედნიეროდ, დღეს ვცხოვრობთ სახელმწიფოში, რომელსაც სრულად აქვს გააზრებული საკუთარი პოზიცია და პასუხისმგებლობა მოქალაქეების წინაშე. სახელმწიფო უკვე წლებია, აღნიშნული დაავადების მქონე ადამიანებისთვის ყოველწლიურად გამოყოფს რამდენიმე მილიონ ლარს, რომელიც სრულად ხმარდება მათ ყოველდღიურ საჭიროებებს, მათ შორის სპეციალურ ეტლებს, მასაჟებს, სამკურნალო პროცედურებსა და სხვადასხვა აუცილებელ ინვენტარს. დღეს სახელმწიფო აკეთებს მაქსიმუმს იმ მოცემულობის ფარგლებში, რაც თანამედროვე მედიცინას გააჩნია და ყველაფერს ახორციელებს იმისთვის, რომ ამ ადამიანებსა და მათ მშობლებს ცხოვრება შეუმსუბუქოს.“- წერს ჩიხელიძე.
