თოთხმეტი წელი გავიდა იმ დღიდან, როდესაც ქართველმა ხალხმა ქვეყნის განვითარების ახალი გზა აირჩია. ბიძინა ივანიშვილის ლიდერობით შესაძლებელი გახდა ხელისუფლების მშვიდობიანი ცვლილება და „ნაციონალური მოძრაობის“ მმართველობის დასრულება. ეს იყო არჩევანი ადამიანის ღირსების, მშვიდობისა და დამოუკიდებელი საქართველოს სასარგებლოდ, – განაცხადა საპარლამენტო უმრავლესობის წევრმა, არჩილ ბერიძემ, პარლამენტის პლენარულ სხდომაზე სიტყვით გამოსვლისას.
მისი განცხადებით, დღეს წარსულისა და აწმყოს გათანაბრებას ცდილობენ და ამიტომ უნდა ითქვას, თუ რა მივიღეთ “ქართული ოცნების” მმართველობის 14 წლის თავზე. ბერიძემ გაიხსენა “ნაციონალური მოძრაობის” მმართველობის დრო და აღნიშნა, რომ დღეს გვაქვს გარემო, სადაც ადამიანს შეუძლია თავისუფლად გამოხატოს აზრი, გააკრიტიკოს ხელისუფლება და საკუთარი მომავალი მუდმივი შიშის გარეშე დაგეგმოს.
„დღეს, როცა წარსულისა და აწმყოს გათანაბრებას ცდილობენ, უნდა ვთქვათ, საიდან მოვედით და რა მივიღეთ ამ თოთხმეტი წლის თავზე.
ეს შედარება ადამიანით უნდა დავიწყოთ. ვერ დავივიწყებთ „ნაც-მოძრაობის რეჟიმის“ დროს, ხელისუფლების სახელით გაუბედურებულ ოჯახებს, ძალადობასა და უსამართლობას. ვერც მუდმივ შიშს დავივიწყებთ, როდესაც ყველგან გვისმენდნენ — სახლში, ქუჩაში, თუ მეგობრებთან.
თოთხმეტი წლის თავზე დღეს გვაქვს გარემო, სადაც ადამიანს შეუძლია თავისუფლად გამოხატოს აზრი, გააკრიტიკოს ხელისუფლება და საკუთარი მომავალი მუდმივი შიშის გარეშე დაგეგმოს.
ჩვენ გვახსოვს, რა დღეში აგდებდნენ ბიზნესს — ციხეში იძულებით გადაფორმებული ქონებებები და დათმობილი წილები. ხელისუფლების ჩარევის გარეშე მცირე ბიზნესის წარმოებაც კი წარმოუდგენელი იყო. დღეს კი ბიზნესი თავისუფალია და განვითარების არნახული შესაძლებლობა აქვს.
გვახსოვს ციხეებში გამეფებული ძალადობა და ოჯახის შიში — დაბრუნდებოდა თუ არა მათი ახლობელი ცოცხალი. ამ ტკივილის დავიწყების უფლება არ გვაქვს.
თოთხმეტი წლის განმავლობაში ჩვენი გამორჩეული მონაპოვარი უწყვეტი მშვიდობაა. უკრაინაში ომისა და ჩვენს სამეზობლოში მძიმე მოვლენების ფონზე მისი ფასი განსაკუთრებით ნათელია.
თოთხმეტი წლის თავზე მივიღეთ ძლიერი სახელმწიფო და რეალური სუვერენიტეტი — საქართველოს მომავლის შესახებ გადაწყვეტილებები მიიღება აქ, საქართველოში, ქართველი ხალხის ინტერესების გათვალისწინებით.
საზოგადოება დამეთანხმება, რომ სახელმწიფოს გაძლიერების განუყოფელი ნაწილია კორუფციასთან უპრეცედენტო ბრძოლა და კრიმინალის წინააღმდეგ მკაცრი მოქმედება. საკუთარი გუნდის შიგნით გამოვლენილ დანაშაულზეც არ დაგვიხუჭავს თვალი. რაც იმის ნათელი მაგალითია, რომ კანონის წინაშე ყველა თანასწორია — თანამდებობა და პოლიტიკური კუთვნილება პასუხისმგებლობისგან ვერავის გაათავისუფლებს.
ამ წლების განმავლობაში, ჩვენი ხელისუფლების ერთი-ერთი მთავარი პრიორიტეტი პენსიონერებისა და დევნილი ოჯახების მხარდაჭერაა. სწორედ ამის დასტურია, პრემიერ-მინისტრის ახალი ინიციატივია, რომლის მიხედვითაც 2027 წლიდან 70 წლამდე პენსიონერების პენსია 20 ლარის ნაცვლად 45 ლარით გაიზრდება. დევნილ ოჯახებს კი შეეძლებათ, საცხოვრებლის მიღების ნაცვლად, ოჯახის თითოეულ წევრზე 10 000 ლარის კომპენსაცია აირჩიონ.
სწორედ ეს არის ადამიანებზე ზრუნვის პოლიტიკა, რომელიც კონკრეტულ გადაწყვეტილებებსა და ქმედებებში აისახება,” – აღნიშნა ბერიძემ.
მან ასევე ხაზი გაუსვა კულტურის სფეროში ბიძინა ივანიშვილისა და ფონდ „ქართუს“ წვლილს ტაძრების, თეატრებისა თუ მუზეუმების აღდგენაში და აღნიშნა, რომ ამ 14 წლის მანძილზე მივიღეთ გამოაშკარავებული აგენტურული ქსელი, რომლის წევრებიც უკვე აღარ მალავენ უცხო ქვეყნების ინტერესებისთვის მსახურებას.
„მე პოლიტიკაში ხელოვნებიდან მოვედი, ამიტომ კულტურაზე ზრუნვა ჩემთვის განსაკუთრებით მნიშვნელოვანია. ბიძინა ივანიშვილისა და ფონდ „ქართუს“ მხარდაჭერით აღდგენილი ტაძრები, თეატრები და მუზეუმები, ლევილის ისტორიულ მამულზე ზრუნვა, იოანე-ზოსიმეს ხელნაწერის საქართველოში დაბრუნება ჩვენი ეროვნული მემკვიდრეობის დაცვის მნიშვნელოვანი მაგალითებია. ასე ვინარჩუნებთ ჩვენს ისტორიას და გადავცემთ მას მომავალ თაობებს.
ამავე დროს, მივიღეთ გამოაშკარავებული აგენტურული ქსელი, რომლის წევრებიც უკვე აღარც მალავენ, რომ უცხო ქვეყნების ინტერესებს ემსახურებიან და დაკვეთებს გარედან იღებენ.
და ბოლოს, ჩვენი უმთავრესი მიზანი საქართველოს ერთიანობაა — აფხაზეთსა და სამაჩაბლოში მშვიდობიანი დაბრუნება, ნდობის აღდგენა და საერთო მომავლის შენება.
როგორც ქართველს, ხელოვანსა და ჩვენი საზოგადოების წარმომადგენელს, მინდა ჩემი წვლილი შევიტანო ამ ოცნების ასრულებაში.
ჩვენს ერთიან, მშვიდობიან და ძლიერ საქართველოს გაუმარჯოს!” – განაცხადა ბერიძემ.
