აშშ-ის ფედერალური კომუნიკაციების სააგენტოს ხელმძღვანელმა ამერიკული სამაუწყებლო კომპანიები ახლო აღმოსავლეთის კონფლიქტის გაშუქებისას „სიცრუესა და ახალი ამბების დამახინჯებაში“ დაადანაშაულა.
ბრენდან კარმა, შაბათს სოციალურ ქსელში გამოქვეყნებულ პოსტში „ფეიკ-ნიუსები“ გააკრიტიკა და დაიმუქრა, რომ მაუწყებლობის ლიცენზიებს გააუქმებს, თუ ინდუსტრია „კურსს არ გამოასწორებს“.
„მაუწყებლებმა საზოგადოებრივი ინტერესების შესაბამისად უნდა იმუშაონ, წინააღმდეგ შემთხვევაში ისინი ლიცენზიებს დაკარგავენ“, – განაცხადა კარმა.
თავის პოსტს მან დაურთო დონალდ ტრამპის პოსტი Truth Social-იდან, სადაც პრეზიდენტი კონფლიქტის დროს „შეცდომაში შემყვან“ და „საშინელ რეპორტაჟებზე“ ჩიოდა.
CBS News-თან საუბრისას, კარმა თქვა: „ხალხი მიეჩვია აზრს, რომ ლიცენზიები ერთგვარი საკუთრების უფლებაა და არ არსებობს არაფერი, რაც მათ დაკარგვას გამოიწვევს. მე ვცდილობ, დავეხმარო მათ და ვუთხრა, რომ არა – არსებობს საზოგადოებრივი ინტერესი და მაუწყებლობა სულ სხვა რამაა“.
მანამდე კონფლიქტის გაშუქების გამო ამერიკული მედიასაშუალებები აშშ-ის პრეზიდენტმა დონალდ ტრამპმაც გააკრიტიკა.
