ირანს დაახლოებით ორ კვირაში ნავთობის მოპოვების მნიშვნელოვნად შემცირება მოუწევს, თუ აშშ-ის ბლოკადა წარმატებული აღმოჩნდება. ინფორმაციას Financial Times-ი ავრცელებს.
თუმცა, როგორც გამოცემა იუწყება, თეირანი ფიქრობს, რომ ის უკეთესად გაართმევს თავს ეკონომიკურ ზეწოლას, ვიდრე აშშ-ის პრეზიდენტი, დონალდ ტრამპი ნავთობზე გაზრდილ ფასებს გაუმკლავდება.
თანამგზავრის მიერ მოპოვებული ინფორმაციის თანახმად, ირანის ნავთობის საცავები ახლა 51%-ით არის შევსებული, რაც იმას ნიშნავს, რომ, თუ ისლამური რესპუბლიკა მის რეალიზებას ვერ შეძლებს, „შავი ოქროს“ მოპოვების შეჩერება მოუწევს.
Financial Times-ის ინფორმაციით, ირანი დღეში დაახლოებით 1,8 მილიონ ბარელ ნავთობს ყიდის, ხოლო, თუ ნავთობის მარაგი 92 მილიონ ბარელს გადააჭარბებს, თეირანი ახლად მოპოვებულ წიაღისეულს ვერსად შეინახავს.
სინამდვილეში, ნაკლებად სავარაუდოა, რომ ირანი თავისი საცავების შევსებას დაელოდება და სპარსეთის ყურის ქვეყნების მსგავსად მოპოვებას შეამცირებს. როგორც გამოცემა წერს, წლების განმავლობაში საერთაშორისო სანქციების ქვეშ ყოფნით, თეირანს ნავთობპროდუქტების წარმოებაში კორექტივების შეტანის მდიდარი გამოცდილება დაუგროვდა.
