აზერბაიჯან-საქართველო-თურქეთის თანამშრომლობა სხვა ქვეყნებისთვის სტრატეგიული პარტნიორობის მოდელს წარმოადგენს, – ამის შესახებ თურქეთის ვაჭრობის მინისტრმა ომერ ბოლატმა კახეთის რეგიონში გამართულ აზერბაიჯან-საქართველო-თურქეთის მე-7 ბიზნეს ფორუმზე განაცხადა.
მინისტრმა ხაზი გაუსვა სამ ქვეყანას შორის ეკონომიკური ინტეგრაციის გაძლიერების მნიშვნელობას: „დიდი მნიშვნელობა აქვს თანამშრომლობის გაფართოებას ენერგეტიკის, ტრანსპორტის, პორტებისა და აეროპორტების ოპერაციების, საინფორმაციო ტექნოლოგიებისა და ხელოვნური ინტელექტის სფეროებში. მთავრობის წარმომადგენლების მთავარი მოვალეობაა ბიზნესისთვის ხელსაყრელი გარემოს შექმნა და ინვესტიციებსა და ვაჭრობაში არსებული ბარიერების მოხსნა“.
ბოლატმა დასძინა, რომ მეზობელი ქვეყნები, პირველ რიგში, სავაჭრო ურთიერთობებს ახლო პარტნიორებთან ავითარებენ: „ამ მხრივ, უმნიშვნელოვანესია თურქეთს, აზერბაიჯანსა და საქართველოს შორის ეკონომიკური ინტეგრაციის გაღრმავება. სამ ქვეყანას შორის თანამშრომლობა არა მხოლოდ მეზობლურ კავშირებზე, არამედ მეგობრობის, სტრატეგიული პარტნიორობისა და ალიანსის პრინციპებზეც არის დაფუძნებული. ისინი ეკონომიკურად და კომერციულად ერთმანეთზე დამოკიდებულ პარტნიორებად მოქმედებენ“.
მან ასევე ხაზგასმით აღნიშნა, რომ ისეთი პროექტები, როგორიცაა ბაქო-თბილისი-ჯეიჰანის ნავთობსადენი, ბაქო-თბილისი-ერზერუმის გაზსადენი და ბაქო-თბილისი-ყარსის რკინიგზა, რეგიონის ქვეყნებს შორის ეკონომიკური და ენერგეტიკული კავშირების კიდევ უფრო გაძლიერებისკენ მიისწრაფვის.
„ეს პროექტები აზერბაიჯან-თურქეთ-საქართველოს ეკონომიკური თანამშრომლობის ოქროს პროექტებად ითვლება და სასიცოცხლოდ მნიშვნელოვან როლს ასრულებს რეგიონის ეკონომიკური რუკის ჩამოყალიბებაში“, – განაცხადა მინისტრმა.
Report.az
