ჩვენ, მათ შორის, უკრაინის ხელისუფლება პრეტენზიების ტონით არ უნდა გველაპარაკოს. მე გუშინ ჩემს პასუხში მას [რუსლან სტეფანჩუკს] მივწერე კიდევაც, რომ თუკი უკრაინის ხელისუფლება მოელის, რომ ყველამ აწონ-დაწონოს სიტყვა მათ მიმართ, ასევე მოველით ჩვენ ყველას მხრიდან, რომ აწონონ საკუთარი სიტყვა და გადაწყვეტილება საქართველოსა და ქართველ ხალხთან დაკავშირებით, – განაცხადა საქართველოს პარლამენტის თავმჯდომარემ, შალვა პაპუაშვილმა ჟურნალისტის კითხვის პასუხად.
მისი თქმით, უკრაინას შეუძლია პრეტენზიების ტონით ესაუბროს დასავლეთ ევროპის დიდ ქვეყნებს, რადგან გლობალ უსაფრთხოებაზე პასუხისმგებელი ქვეყნების პასუხისმგებლობაა, რომ საერთოდ ეს ომი დაიწყო, მაგრამ ეს ტონი საქართველოზე არ უნდა გადმოიტანონ.
„ჩვენ არ ვართ არც გერმანია, არც რომელიმე დასავლეთ ევროპული ქვეყანა, რომელსაც შეიძლება უკრაინამ პრეტენზიები წაუყენოს და სამართლიანად წაუყენოს, იმიტომ, რომ თავის დროზე საკმაოდ დიდი ქვეყნები, მათ შორის დასავლეთ ევროპის, და ევროკავშირი რომ ყოფილიყო მოწოდების სიმაღლეზე, ეს ომი არ იქნებოდა და რა თქმა უნდა უკრაინამ პრეტენზიები უნდა წაუყენოს ამ ხალხს, იმიტომ, რომ ეს არის გლობალური ძალების, გლობალ უსაფრთხოებაზე პასუხისმგებელი ქვეყნების პასუხისმგებლობა, რომ ეს ომი საერთოდ დაიწყო. ეს არაერთხელ უთქვამს ამერიკის შეერთებული შტატების პრეზიდენტს, რომ ეს ის ომია, რომელიც არ უნდა დაწყებულიყო. ამიტომ მათი პრეტენზიები დასავლეთ ევროპის მიმართ გასაგებია, მაგრამ ამ ტონს ნუ გადმოიტანენ ქართველ ხალხზე, ჩვენ ამ ტონს არ მივიღებთ არც ზოგადად და არც კონკრეტულად ზელენსკისგან ერთ მისხალ საყვედურს. იმ პრეზიდენტი ზელენსკისგან არ მოვითმენთ, რომელმაც საქართველოს ელჩი ფაქტობრივად გამოაძევა. ყველა ელჩმა რომ მიატოვა კიევი, ჩვენი ელჩი იქ იყო ბოლომდე, სანამ ზელენსკიმ არ უთხრა, იქნებ სახლში წასულიყავიო. რომ არა საქართველოში უკრაინის ელჩის გაწვევა იმის გამო, რომ იქ ქართველები არ გაუშვა სახელმწიფომ საკუთარი მობილიზაციით, რომ არა პრეზიდენტ ზელენსკის ტყუილი და ცილისწამება ქართველი ხალხის წინააღმდეგ, თითქოს სააკაშვილს აწამებენ, კლავენ იმ სააკაშვილს, იმ კრიმინალს, რომელიც მან შეიფარა და დღემდე სააკაშვილი გამოდის და ხან უკრაინულად გველაპარაკება, ხან ქართულად და გვითხრა მან, რომ ის დღემდე არის ზელენსკის რეფორმების საბჭოს თავმჯდომარე. ასეთი პრეზიდენტის მიერ საქართველოზე ერთ ძვირ სიტყვასაც პასუხი გაეცემა.
ომში ყოფნა უფრო მეტი პასუხისმგებლობაა და ამას ღირსეულად უნდა ტარება. საუბარი იყო იმაზეც, გაეროში რეზოლუციას რომ მხარი დავუჭირეთ, ეს კეთილსინდისიერების, წესიერების ნიშანიაო და ამას რა მადლობა უნდაო. ჯერ ერთი, ყველაფერს უნდა მადლობა, თავისთავადი არაფერია. თუ არადა, ჩახედონ სიას, ვინ დაუჭირა მხარი. თუკი ეს ავტომატური წესიერების სტანდარტია ჩახედონ, ვინ დაუჭირა, ვინ თავი შეიკავა და ვინ არ დაუჭირა მხარი და მერე გველაპარაკონ ამასთან დაკავშირებით. ბოლო რამდენიმე წელია, უკრაინელი დელეგაციები სხვადასხვა ფორმატში მხარს უჭერენ ქართველი ხალხის მიმართ ყველა მტრულ გადაწყვეტილებას. ეს წესიერი საქციელია, ეს არის მადლიერება, ასე უნდა მოეპყრო მეგობარს? ჩვენკენ როცა გადმოიხედებიან, ვფიქრობ უკრაინის პრეზიდენტმა ტონს უნდა დაუწიოს“, – განაცხადა პაპუაშვილმა.
