ევროკავშირმა ვერ შეძლო აშშ-ის პასუხისგებაში მიცემა საერთაშორისო სამართლის დარღვევისთვის, – განაცხადა ბლოკის ყოფილმა მთავარმა დიპლომატმა ჟოზეპ ბორელმა. მან ევროკომისიის პრეზიდენტი ურსულა ფონ დერ ლაიენი ძალაუფლების მიტაცებაში დაადანაშაულა და ვაშინგტონთან მის მიერ შეთანხმებული სავაჭრო პაქტის უარყოფისკენ მოუწოდა.
POLITICO-სთან საუბრისას ჟოზეპ ბორელმა, რომელიც 2019-2024 წლებში ფონ დერ ლაიენის ვიცე-პრეზიდენტი და საგარეო საქმეთა უმაღლესი წარმომადგენელი იყო, განაცხადა, რომ აშშ-ის ომი ირანის წინააღმდეგ „უკანონოა საერთაშორისო სამართლის მიხედვით და არ არის გამართლებული გარდაუვალი საფრთხით, როგორც ამას ზოგიერთები ამტკიცებდნენ“.
ბორელის თქმით, ფონ დერ ლაიენი „აგრძელებს თავისი უფლებამოსილების გადამეტებას“ საგარეო პოლიტიკის წარმოებით, რაც, მისი მტკიცებით, ევროკავშირის დამფუძნებელი ხელშეკრულების თანახმად, მის კომპეტენციაში არ შედის.
„ის სისტემატურად მიკერძოებულია აშშ-ისა და ისრაელის სასარგებლოდ“, – განაგრძო ბორელმა და აღნიშნა, რომ ევროპა „იტანჯება ენერგორესურსების ფასების კუთხით დამდგარი შედეგებით, მაშინ როცა პრეზიდენტი ტრამპი ხარობს, რომ ეს კარგია აშშ-სთვის, რადგან ისინი ნავთობის ექსპორტიორები არიან“.
ბორელმა შეაქო ესპანეთის პრემიერ-მინისტრის, პედრო სანჩესის მიდგომა, რომელიც ევროპაში ტრამპის ირანზე დარტყმების ყველაზე მწვავე კრიტიკოსია. ბორელმა აღნიშნა, რომ მისმა მემკვიდრემ, კაია კალასმა, „უფრო მკაფიოდ უნდა დაგმოს საერთაშორისო სამართლის დარღვევები, მიუხედავად იმისა, ამას რუსეთი, ისრაელი თუ აშშ ჩაიდენს“, რადგან ევროკავშირი „კარგავს ნდობას, როდესაც საერთაშორისო ნორმებს შერჩევითად იყენებს“.
ყოფილმა დიპლომატმა ასევე განაცხადა, რომ ევროკავშირმა არ უნდა მოახდინოს იმ სავაჭრო შეთანხმების რატიფიცირება, რომელსაც ფონ დერ ლაიენმა და ტრამპმა გასულ ზაფხულს შოტლანდიაში მიაღწიეს. „ეს გარიგება თავიდანვე უსამართლო იყო. მათ 15%-იანი ტარიფები დაგვიწესეს, ჩვენ კი მათთვის ტარიფებს ვამცირებთ“, – თქვა ბორელმა.
ფონ დერ ლაიენის წარმომადგენლებმა კომენტარზე უარი განაცხადეს, ხოლო კალასის წარმომადგენლებს Politico-სთვის პასუხი ჯერჯერობით არ გაუციათ.
