დონალდ ტრამპმა ლათინური ამერიკის ნარკოკარტელების განადგურების პირობა დადო და ამ მიზნით სამხედრო ალიანსი შექმნა. კოალიციის ჩამოყალიბების შესახებ მან „ამერიკის ფარის“ (Shield of the Americas) სამიტზე განაცხადა, რომელსაც ლათინური ამერიკის 10-ზე მეტი სახელმწიფოს ლიდერი დაესწრო. შეხვედრა 7 მარტს, მაიამის მახლობლად, ტრამპის გოლფ-კლუბში გაიმართა. სამიტს არ ესწრებოდნენ მექსიკის, ბრაზილიისა და კოლუმბიის პრეზიდენტები.
აშშ-ის პრეზიდენტის თქმით, შეთანხმების არსი „ბოროტი კარტელებისა და ტერორისტული ქსელების გასანადგურებლად“ სასიკვდილო სამხედრო ძალის გამოყენების მზადყოფნაში მდგომარეობს.
„როგორც შევქმენით კოალიცია ახლო აღმოსავლეთში „ისლამური სახელმწიფოს“ გასანადგურებლად, ახლა იგივე უნდა გავაკეთოთ კარტელების გასანადგურებლად საკუთარ სახლში“, – განაცხადა ტრამპმა.
მან ასევე მექსიკას დასავლეთ ნახევარსფეროში ნარკოკარტელების საქმიანობის ეპიცენტრი უწოდა. „ჩვენ ისინი სრულად უნდა გავანადგუროთ, რადგან მდგომარეობა სულ უფრო უარესდება. ისინი იპყრობენ საკუთარ ქვეყანას. კარტელები მართავენ მექსიკას“, – დასძინა ტრამპმა. მექსიკის პრეზიდენტმა, კლაუდია შეინბაუმმა, არაერთხელ განაცხადა, რომ ის აშშ-ს ქვეყნის ტერიტორიაზე ძალოვანი ოპერაციების ჩატარების უფლებას არ მისცემს.
